கம்பீரம்

                                            
                                        காட்டுக்குக் கம்பீரம்
                                        காட்டரசன் கர்ஜனை
                                        நாட்டுக்குக் கம்பீரம்
                                        நல்லதொரு ஆட்சி

                                    வீட்டுக்குக் கம்பீரம்
                                    விளக்கேற்ற வந்தவளாலே
                                   வந்தவளின் பெருமிதம்
                                   வாய்த்தவளின் கம்பீரத்தாலே!
                                  
                                   வாய்த்தவனின் கம்பீரம்
                                   வாழ்க்கைக்கு வளம் சேர்ப்பதாலே!
                                   வளமான வாழ்க்கையே
                                   சமுதாயத்தின் கம்பீரம்

                                 சமுதாயச் செழிப்பே
                                 நாட்டுக்குக் கம்பீரம்
                                ஔவை சொன்ன குடிஉயரக்
                                கோன் உயர்தல் போலே

                                ஒன்றன் கம்பீரம்தான்
                                மற்றதற்கு அடித்தளம்
                               அடித்தள பலத்தால்
                               அ.ழகான இல்லமமையும்
                               அழகிய இல்லத்தின் தேவை

                               அன்பான உள்ளமே!

சமுதாயம்

                                  சமுதாயச் சந்தையிலே
                                  நாளுக்கொரு வழக்கு
                                  ஆளுக்கொரு நீதி

                                 காட்டுத் தீயாய் சில சேதி
                                 கணக்கற்றோரைப் பொசுக்கும்
                                 நாட்டில் நலமும் தரும்
                                 அத்தி பூத்தாற் போல

                                 போதி மரத்தடி மகான்களாக
                                  மாற வேண்டாம்
                                  குழாயடிச் சண்டையிடும்
                                  குதர்க்கவாதிகளாகாதீர்

                                சமுதாயச் சந்தையிலே
                                விஞ்ஞான விந்தையிலே
                                விழுந்திட்டாலும்
                                 விலையாகாதீர்

                                புடம் போட்ட மனதிலே
                                படம் போட்டுப் பார்த்து
                                வடம் இட்டிழுப்பீர் மனதை
                                வளமான பாதைக்கு

                                மெய்ஞானத்திலே தோய்வு-வாழ்வில்
                                மேடேறும் வாய்ப்பு!

                                   

உயர் முயற்சி

                                   உம்மையறிந்தவர் உரையாதிருப்பாரோ
                                   மாந்தரே -உயர்
                                   தன்மையோடு புரியும் நற்செயல்
                                   புகழாதிருப்பாரோ-மாந்தரே

                                  எத்தனை ஆயிரம் திட்டங்கள் தீட்டினும்
                                 மாந்தரே -அத்தனை
                                 திட்டமும் சட்டமெனச் செல்லுமா
                                 மாந்தரே

                                ஆழியிலுள்ள சிப்பியின் முத்தாய்
                                மாந்தரே -அனைத்துமே
                                ஆகுவதுண்டோ மாந்தரே

                                பாழாய்ப்போன சிப்பியையும் தான்
                                மாந்தரே -பக்குவமாய்
                                 கலைப்பொருள் செய்வாரே மாந்தரே

                               ஆங்கிலப் பயிற்சி அவசியமென்றாலும்
                                மாந்தரே -ஆற்றல்
                               அத்துணை பேருக்கும் ஒன்றாயிருக்குமோ
                               மாந்தரே

                             எல்லோரையுமேற்றும் எண்ணமென்றுமுண்டு
                             மாந்தரே -என்றாலும்
                             கரமொன்றின் விரல்களைந்தும்
                             ஒன்றாயிருத்தல் கூடுமோ?

                             உந்தன் முயற்சி உயர்ந்த முயற்சியே
                             மாந்தரே -விதை ஒன்று பழுதானால்
                             உழவனை நிந்தித்தல் நியாயமோ?

                            பட்டபாட்டிற்கான பலன் வேண்டாம்
                            என்பரோ மாந்தரே -பதர் ஒன்று
                            இருந்தால் பயிர் எல்லாம் பதர் எனல்
                             நியாயமோ?

முட்டாள் கூட்டம்

                                              
                                              முட்டாள்களின் தேசத்தில்
                                               முட்டுக்கட்டை என்பதிருக்கும்

                                              அறிவிலிகள் கூட்டத்தில்
                                              அட்டூழியம் என்பதிருக்கும்

                                              மூர்க்கர்களின் இடத்திலே
                                               முறைப்பு தவிர வேறேதுண்டு?

                                              மட்டமான மனிதர்களிடம்
                                              மரியாதை எதிர்பார்த்தல் முறையோ?

                                            அட்டகாசம் செய்யும்
                                             ஆணவக்காரர்களை
                                            ஆண்டவனிடம் விட்டுவிடு.

                                             ஆண்டொன்று போனால் வயதொன்று
                                             போகிறது,
                                             வஞ்சனை மட்டும் போகாதோ?

                                                 வீணர்களின் நெஞ்சில்
                                                 விஷமிருப்பதால்,
                                                 விபரீதம் நாம் காண்பது தகுமா?

சிந்தனையும்,சிரிப்பும்

                                                    
                                                 சிறு வயதிலேயே
                                                 சீறும் பார்வையா?
                                                 சீரிய பார்வையா?
                                                 சிந்தனையின் சிகரமாய்
                                                 நீ இருந்தாலும்
                                                 சிரித்து மகிழும் இளநகையே
                                                 அழகு !

                                                
                                              அறிவுப் பார்வை உனதாயிருக்கலாம்
                                              அழிவு போக்கும்,அன்பு தேக்கும்
                                               ஆன்மச் சிரிப்பு அழகல்லவா?

                                            சிறு நகை அழகு
                                            குறு நகை அழகு
                                            புன்னகை அழகு
                                            பூஞ்சிரிப்பு அழகு
                                            சிந்தனையோடு சேர்ந்த
                                             சிரிப்பென்பது
                                            அழகோ அழகு!

கலைமகள் கடாட்சம்

                                              
                                             அன்னையே சரணம்
                                             சரணம் தாயே!
                                             மகா சரஸ்வதி-என்
                                             மனதில் வந்து இறங்கு

                                           கலைவாணியே!-என்
                                           உள்ளத்தின் உள்ளே
                                           உறைந்திடு!
                                           அகம் முழுதும்
                                           ஆக்கிரமி!!

                                       இகம் உயர்த்தும் கலை தனைத்
                                       தந்திடு!
                                       இதயம் எங்கிலும்
                                        இன்ப ஊற்றாய்ப் பொங்கிடு!

பிணி

                                 அங்கம் முழுதும்
                                 அரற்றி அழுகிறது
                                 ஆற்றாமையினால்
                                 அலறித் துடிக்கிறது

                                  தங்கத்தால் பூட்டியங்கத்தைத்
                                 தாங்கவே செய்தாலும்
                                 தாளாத துயர் தந்து
                                 தவிக்க வைக்கும் பிணியே

                                அணிமணிகள் பூட்டியே
                                அழகு பல செய்தாலும்
                                 பிணியே நீ வந்திட்டால்
                                பெருந்துயர் தான் சேராதோ?

                                  சோம்பல் நோய்தான்
                                   சூழ்ந்து கொண்டால்
                                   சோகமே சேர்ந்திடுமே-வாழ்வின்
                                    வேகமே போய்விடுமே!
                                   உல்லாசம் கண்டிடவே
                                   உட்கார்ந்தே பணி செய்தால்
                                  பிணிதான் சூழ்ந்திடுமே

                             உழைப்பு என்னும்
                             உயர் மருந்தால்
                             உற்ற பிணி தீர்த்திடலாம்
                             உல்லாசமாய் வாழ்ந்திடலாம்!

                             வண்ண,வண்ண மாத்திரையால்
                            வாழ்வு வண்ணம் இழந்ததென்னே?
                            வகைவகையான மருந்துகளால்
                            வளம் தான் போனதென்னே?

                                      வளம் கண்டிடுவோமா?
                                      வலிமை பெற்றிடுவோமா?
                                       வறட்சி நிலை விடுத்து

                                       வனப்பான வாழ்வு கிட்டுமா?

இணையம்

                                                  யாதும் ஊரே,யாவரும் கேளிர்
                                                  இது,
                                                  வெற்றுச்சொல்-இணையத்தினாலே
                                                   வெற்றிச் சொல்.

                                               யாதும் ஊரே,யாவரும் கேளிர்
                                                இது வெறும்
                                               வார்த்தை-இணையத்தினாலே
                                               இது,வாழ்க்கை.

                                            
                                               உலகியல் தந்திடா நிறைவை
                                               உலவிகள் தந்திடுது.
                                               பழகப் பழகப் புளிக்கிறது
                                               பக்கத்திலிருக்கும் நட்பு
                                               பார்க்காமல் பேசுவது கூடப்
                                               பிடிக்கிறது,பண்பான நட்பு!

                                    

                                                பிரபஞ்சம் கைக்குள் அடக்கம்

                                                பிரச்சனையும் கணினிக்குள்

                                                அடக்கம்,எதில் இல்லை?

                                           அஞ்சல் தலையில்லை

                                           முத்திரையில்லை,

                                          அடுத்த நொடியில் கடிதம்
                                          அகிலயெல்லையில்!

                                          முகப் புத்தகம் எத்துணை
                                           அகம் காட்டுகிறது!

                                              வலைப்பூவுக்குள் எத்துணை
                                              வாழ்க்கை வழிகள்?
                                              வலையில் விழ,விழ
                                              வாழ்வின் எல்லைகள்
                                              விரிகிறது........
                                              இவையெல்லாம் இணையம்
                                              தந்திடும் இமயவசதிகள்

                                             கணினி செய்யும் விந்தை?
                                             கணக்கிலடங்காது
                                             இணையத்தின் இதயம்
                                             கணினி,
                                             கணினியின் கால்கள்
                                             இணையம்.
                                            இணைய இணைப்புக் கொடுத்து
                                            விட்டால்,
                                            இகத்தின் வாசல்கள் திறக்கிறது.

உலக உத்தமர்

                                         உலக அரங்கில் தாயகத்தை
                                         உயர்த்தி நிறுத்திய
                                         உயரிய ஆத்மாவே,
                                         உளத்தில் மட்டுமா?தவம்,
                                         உணவில் தவம்,
                                          உடையில் தவம்,
                                        உறைவிடத்தில் தவம்

                                                கள்ள நோட்டிலும் உந்தன்
                                                கள்ளமில்லாச் சிரிப்பு!
                                                அத்தனை பேரும் அறிந்த
                                                அன்பான ஆத்மா!
                                                 அகில அளவிலே அன்னைபூமியை
                                                அடையாளம் காட்டியது
                                               அண்ணலின் அடிகள்.

                                           வாழ்விலே தவம் செய்து
                                           உயர்வோருண்டு,
                                           தவமே வாழ்க்கையாய்
                                           வாழ்ந்திட்ட மகானே!
                                           கோணல் புத்திக்காரர்களையும்-அந்தக்
                                           கோலால் தட்டி நேராக்கு.
                                           இந்திய மண்ணில் நீரே மகாத்மா
                                           ஆன்மீக ஆத்மாக்களே அறிவர்
                                         இரமணரையும்,இராமலிங்கரையும்
                                         உலகோர் அனைவரும் அறிந்த
                                           நீரே மகாத்மா!

குடியரசு

2007 குடியரசு தினத்தன்று பள்ளியில் கொடியேற்றத்தின்போது வாசித்தது.
காட்சிகள் மாறலாம். காலம்?

                                             எமக்குத் தொழில் கவிதை
                                             என்றான் ஏற்றமிகு கவிபாரதி,
                                              எம் தொழிலும்....

                                             பாட்டுத் திறத்தாலே வையத்தையே
                                             பாலித்திட எண்ணிட்டான் பாரதி,
                                             எந்தன் வரிகள்
                                             செவி மடுக்கும் உங்களின்
                                             சிந்தை நிரப்பட்டும்.

                                            மாநிலம் பயனுற வாழும் வல்லமை
                                             கேட்டான் மகாகவி-எம்
                                            மாணவியரின் மனது தொடும்
                                            மணி மந்திரச் சொற்கள் வேண்டி
                                            பைந்தமிழன்னையின் பாதகமலத்தில்
                                           பாமலர் சூட்டுகின்றேன்.

                                          குடியாட்சியிலே,
                                           குதூகலம் கொஞ்சுகிறதா?
                                           குழப்பமே மிஞ்சுகிறதா?

                                         பட்டிமண்டபத் தலைப்பு போல்
                                         உள்ளதா?ஆம்,
                                         நாணயத்தின் இருபக்கத்தைப் போல
                                         குடியாட்சியிலே,

                                         குதூகலமான வாழ்வொரு பக்கம் எனில்
                                         குற்றங்களும் மலிந்திருப்பது
                                         கண்கூடு தானே?

                                        வான்வெளிச் சோதனை பல
                                         வானளாவிய சாதனையாய்!
                                        வீழ்ச்சிப் பாதையில் சென்ற
                                        இரயில்வே துறை கூட
                                        வெற்றிப் பாதை நோக்கி,
                                        இணைந்தது இந்தியா ஒரே ரூபாயில்!
                                         இலவசங்கள் பலப்பல,
                                        கட்சியின் காட்சியாய்!

                                           வளர்ச்சியின் வேகமென்னவோ
                                            வாயு வேகம் தான்!
                                            வீழ்ச்சியும் பாரதத்தைப்
                                            படுகுழியில் தள்ளுகிறதே,
                                            சட்டங்கள் பலவற்றால்-மனிதன்
                                            சங்கடத்தில்,சாக்காட்டிலும்!

                                            குழந்தைகள் குவியல்களாய்,
                                             குவித்திட்ட அரக்கன் கோலாகலமாய்,
                                             அசம்பாவிதங்கள் அன்றாட
                                             சம்பவங்களாய்,
                                            அன்றாட சம்பவங்கள் அல்லல்
                                             நிறைந்ததாய்!

                                            தீர்வு?
                                            ஒன்றே,ஒன்று தான்!
                                             தனிமனித ஒழுங்கு.
                                            கணிப்பொறிச் சாதனைகளாலே
                                             எம் நாட்டுக் கண்மணிகள்
                                             கனவான்களாய்,தனவான்களாய்
                                             இருத்தல் போதாது,
                                             கண்ணியவானாய் இருந்திடல்
                                              வேண்டும்
                                             காத்திடல் வேண்டும்,வளரும்
                                            இந்தியாவை
                                              வல்லரசான இந்தியாவாய்!!

தங்கம்

                                                   உன் மதிப்பு என்றும்
                                                   உயர் மதிப்பே!
                                                   வறுமைப் பிடியினில்
                                                   வருணிக்க வார்த்தையாய்,
                                                   வசதி படைத்தோரிடம்
                                                   வடிவங்கள் பலவாக!!

                                                   அரச போகத்தினருக்கு
                                                  அலங்காரப் பொருளாய்
                                                  அம்மனின் திருக்கழுத்தில்
                                                  அழகுமிகு அணிகலனாய்
                                                   அல்லலுறும் வேளையிலே
                                                    அடகுக்கடை சென்றுவரும்
                                                  ஆபத்பாந்தவனாய்!

                                             பத்தரைமாற்றுக் கட்டியாய்
                                             பதுக்கல்காரரின் பிடியிலே!
                                             கண்களைக் கூசவைக்கும்
                                             காசுக்காரரன் கழுத்துக்கள்,
                                             எது,எப்படியோ?
                                             அன்றும்,இன்றும்,என்றும்
                                             உன் மதிப்பு,உயர் மதிப்பே!

                                            பெட்டகத்திலுக்,பேழையிலும்
                                            பதுங்கியிருக்கும் போதல்ல
                                            பயனுறு தேவைக்கு-நீ
                                            பயன்படும் போது.

மாய உலகு

    
                                 மாயை இவ்வுலகு,
                                 மாய்வது உறுதி,
                                      மன ஆசைகள் மாயாததேன்?

                                      இன்னல்கள் நிறைந்ததிவ்வுலகு
                                      இறப்பென்பது உறுதி,
                                       இன்பத்தையே மனம் நாடுவதேன்?

                                      சத்தங்கள் நிறைந்ததிவ்வுலகு
                                      சாக்காடென்பது உறுதி-மனச்
                                      சந்தடிகள் ஓயாததேன்?

                                    ஆடம்பரம் இவ்வகிலம்
                                    ஆட்டம் ஓய்வது உறுதி
                                     ஆகாயம் முட்டும் ஆசைகள்
                                    பிறப்பதேன்?
                                    மனம் ஒரு?

பொங்கல் திருநாள்

                                                
                                                 பொங்குக பொங்கல்
                                                 தங்குக மங்கலம்

                                            
                                            உழவர் திரு நாளில்

                                            உவகை நிறையட்டும்!  

                                      
                                                பச்சரிசிப் பொங்கல்
                                                பால் போலப் பொங்கி
                                                பாங்கான வாழ்வு தரட்டும்
                                                நம் அனைவருக்கும்!              

புல்லை மறுத்த பூமி

                                                  
                                                    நெல்லும் ,நெடுங் கதிரும்
                                                    விளைவித்து மனித இனம்
                                                    காத்திட புல்லினைக்
                                                    களையென நினைத்துக்
                                                    களைந்திடச் சொன்னாயோ?
                                            
                                                   காயும்,கனியும்,கதிரும்
                                                   தந்து உனைக் காக்கிறேனே,

                                              கால்நடைக்குக் களையெனக்
                                              களையச் சொல்லிப்
                                              புல்லினை மறுத்தாயோ?

தன்னை அறிதல்

                          ''உன்னை அறிந்தால் நீ
                            உன்னை அறிந்தால்
                            உலகத்தில் போராடலாம்''
தன்னை அறிதலே சீரிய நெறிமுறையில் வாழ்வதற்கான சிறப்பான வழி.
கண்ணதாசனின் உயரிய வரிகள்.
                                   ''திருடனாய்ப் பார்த்துத் திருந்தாவிட்டால்
                                     திருட்டை ஒழிக்க முடியாது''
என்ற பட்டுக்கோட்டையின் வரிகள் திருட்டுக்கு மட்டுமல்ல,ஒவ்வொரு செயலுக்குமே!
                                    ''குடி உயரக் கோன் உயரும்''
ஔவைப் பிராட்டி சொன்னது.உயரிய சமுதாயம் படைக்க வேண்டுமானால் தனி மனித ஒழுங்கு வேண்டும்.ஒவ்வொரு மனிதனும் தன்னைத் தானே உணர்ந்து,சரி செய்து கொண்டாலே சமுதாயம் திருந்தும்.கண்ணதாசன் இதனை,
                                             ''தன்னைத் தானும் அறிந்து கொண்டு
                                               ஊருக்கும் சொல்பவர்கள்
                                               தலைவர்கள் ஆவதில்லையா?
என்கிறார்.

நான்காம் தமிழ்

                
                                            கன்னித் தமிழே,
                                            கணினித் தமிழ் நுட்பம் தா!
                                            கல்வி அறிவில்லாதோர்
                                            கண்ணிழந்தோர்,இனி
                                            கணினி அறிவில்லாதோரும்...

                                          வாசித்து,வாசித்து முத்தமிழை
                                          சுவாசித்துக் கொள்ளலாம்
                                          தமிழன்னையிடம்
                                          யாசித்து,யாசித்து இயல்,இசை
                                          நாடகத்தோடு இணையலாம்

                                         ஆனால்,
                                         வலைப்பூவில் விழும்
                                         வாய்ப்பில்லாவிடில்
                                         வரைகலைப் போட்டியில் மாணவரைப்
                                         பங்கு பெறச் செய்வது எங்ஙனம்?

                                         விக்கிபீடியாவின் ஆலமரத்தடியில்
                                         விழுதுகள் கூட்டுவதற்கு விருப்பம்,
                                         வியப்பால் விழி விரிப்பது தவிர

                                         வழியில்லை!
                                        
                                         விக்கிபீடியாவின் கருத்தரங்கு,
                                         இணைய மாநாட்டின் இணைவுகள்
                                         நிகழட்டும் தலை நகரங்களிலும்,
                                         பெரு நகரங்களிலும்!
                                        
                                         அவ்வப்போது பயிற்சிப் பட்டறை
                                          அமைப்பீர்,அழைத்துச் செல்வீர்
                                           அறியாப் பிள்ளைகளை மட்டுமல்ல,
                                         ஆசிரியப் பெரு மக்களையும்!

                                        தீட்டுங்கள் ஒரு சட்டம்
                                        தீந்தமிழை இணையத்தில்
                                        கற்போம்!போடுங்கள் ஒரு
                                        திட்டம்!பைந்தமிழில்
                                        பயனர் பங்களிப்பைப்

                                                 பள்ளி மாணவர் தரட்டும்!

பஞ்சமா?வஞ்சமா?

                                                
                                                  இயற்கை செய்திட்ட
                                                   வஞ்சமா?
                                                  அதனால் விளைந்திட்ட
                                                  பஞ்சமா?

                                                 பாரம் சுமக்கும் மனிதன்
                                                            இயற்கையின்வரமாய்க்
                                                 கிடைத்த தடாகத்தில்
                                                 தண்ணீர் எடுத்து-இயற்கையின்
                                                 வஞ்சத்தையும் அதனால்
                                                 விளைந்த பஞ்சத்தையும்
                                                 வெற்றி கொண்டானே!