பெண்

                                             அறிவு ,அழகு

                                             
                                                 ஆக்கம்  ,ஆற்றல்

                                 

                                                  இனிமை ,இரக்கம்

                                                   ஈகை ,ஈணல்

                                              
                                                உயர்வு ,உற்சாகம்

                                      
                                              ஊட்டம் ,ஊக்கம்

                                               எளிமை ,எழுச்சி

                                             ஏற்றம் ,ஏற்புத்திறன்

                                            ஐஸ்வர்யம்,ஐயம் போக்கல்

                                           ஒழுக்கம் ,ஒற்றுமை

                    
                                         ஓங்கு புகழ் தரும்
                                         ஔடதம் அவளே
                                        அழகிய வாழ்வுக்கு!

மின்னல்

                                    கார்முகில் உனைப்
                                    பிரசவிக்கு முன்பு வலியால்
                                    கத்துகிறதோ,
                                    இடியாய்!

                                   கருமுகிற் கூட்டமிரண்டு
                                   கலந்திட்டுப் பிறந்திட்ட
                                  வெண்மைக் குழவியே!

            
                                           தோன்றிய உடனேயே
                                           தொலைந்திட்டாலுங் கூட
                                           தொல்லைக்குள்ளாக்குகிறாயே !
                                       
                                           உன்னெழில் காண விழைந்தால்
                                          கண்ணில் என்றுமே இருள் !
                                          வானத்தில் உன் வெட்டெனில்
                                          பூமியிலும் மின் வெட்டு !

                                         எங்கும் இருள்!

      
                                  இருளைக் கிழித்து வந்து
                                  இதம் தரும் மழையின்
                                  இனிய அறிவிப்பென்பதால்
                                  இன்பம் உன்னாலே!

உதிரும் விண்மீன்

                                    
                                           வான வெளியின் வடிவழகு
                                           உனைக் கவரவில்லையோ !

                                          கலகலக்கும் கூட்டத்திலே
                                          கலக்காது உதிர்ந்திட்டாய்!
  

விரிவானில் ஒற்றைப் பறவை

                                                அகண்ட பிரபஞ்சத்திலே நீ
                                                அனாதையாய்ப் பறப்பதேனோ?

                                                கூட்டத்திலே சிக்கிட்டால்
                                                கூண்டில் அடைப்பார்கள்
                                                என்றெண்ணித்
                                                தனித்துப் பறந்தாயோ?

மின்மினி

                      
                                                   மேகக் கூட்டத்திலே
                                                   முகிழ்க்கும் மின்னலுக்கு
                                                   மகத்துவம் உண்டெனில்
                                                   இருட்டிலே சிறகடித்துச்
                                                   சிதைந்திடும் உனக்குமுண்டு!

பூபாளம்

                                            மரகதப் பச்சையில் -மஞ்சள்
                                            புஷ்ப ராகங்கள்.

                                            மரகதப் பச்சைக் கம்பளத்திலமர்ந்து
                                            மஞ்சள் புஷ்பங்கள் ராகமிசைக்கிறது

                                              கம்பளத்தில் அமர்ந்த அழகுப்
                                               பவளங்களின் ராகமும்
                                             பார்ப்பதற்கு ரம்யம்.ஆம்
                                             இந்த ராகம்
                                             பார்ப்பதற்கு ரம்யம்

                                            அழகிய மரம் -இறை
                                            அளித்த வரம்!

வயல்

                                        
                                               பண்பை அழிக்கும்
                                               களை அகற்றி,
                                               பாசம் போக்கும்
                                               களை அகற்றி,
                                               நாசம் செய்திடும்
                                               களை அகற்றி,

                                          
                                           அகம் அரித்திடும்
                                           களை அகற்றி,
                                           அழிவு தந்திடும்
                                           களை அகற்றி,

                                
                                         அன்பு நிலத்தினிலே
                                         பண்பு விதை ஊன்றி
                                        பாசப் பயிர் வளர்த்து
                                         பண உரம் தூவினால்
                                        
                                       ஞான மகசூலினை
                                        நாளும் பெறலாம்!

கவிதை

                                                  வண்ண வண்ணக்
                                                   கனவுகளைத் தோற்றுவது

                                                   எண்ண எண்ண
                                                   இனிப்பதாக இருப்பது

                                                   சின்னச் சின்ன
                                                   வார்த்தைக்குள்ளும்
                                                   ஜீவனிருக்கும் ,
                                              
                                                   இதயத்திலிருந்து கிளம்பும்
                                                   இன்பக் கவிதை !

அன்பு

                                                         கொப்பளித்துக்
                                                         குமிழியிடுகிறது,
                                                         தி
                                                         வ
                                                         லை
                                                         க
                                                         ளா
                                                         ய்
                                                         அகமெனும் ஆழியில்!

கம்பீரம்

                                            
                                        காட்டுக்குக் கம்பீரம்
                                        காட்டரசன் கர்ஜனை
                                        நாட்டுக்குக் கம்பீரம்
                                        நல்லதொரு ஆட்சி

                                    வீட்டுக்குக் கம்பீரம்
                                    விளக்கேற்ற வந்தவளாலே
                                   வந்தவளின் பெருமிதம்
                                   வாய்த்தவளின் கம்பீரத்தாலே!
                                  
                                   வாய்த்தவனின் கம்பீரம்
                                   வாழ்க்கைக்கு வளம் சேர்ப்பதாலே!
                                   வளமான வாழ்க்கையே
                                   சமுதாயத்தின் கம்பீரம்

                                 சமுதாயச் செழிப்பே
                                 நாட்டுக்குக் கம்பீரம்
                                ஔவை சொன்ன குடிஉயரக்
                                கோன் உயர்தல் போலே

                                ஒன்றன் கம்பீரம்தான்
                                மற்றதற்கு அடித்தளம்
                               அடித்தள பலத்தால்
                               அ.ழகான இல்லமமையும்
                               அழகிய இல்லத்தின் தேவை

                               அன்பான உள்ளமே!

சமுதாயம்

                                  சமுதாயச் சந்தையிலே
                                  நாளுக்கொரு வழக்கு
                                  ஆளுக்கொரு நீதி

                                 காட்டுத் தீயாய் சில சேதி
                                 கணக்கற்றோரைப் பொசுக்கும்
                                 நாட்டில் நலமும் தரும்
                                 அத்தி பூத்தாற் போல

                                 போதி மரத்தடி மகான்களாக
                                  மாற வேண்டாம்
                                  குழாயடிச் சண்டையிடும்
                                  குதர்க்கவாதிகளாகாதீர்

                                சமுதாயச் சந்தையிலே
                                விஞ்ஞான விந்தையிலே
                                விழுந்திட்டாலும்
                                 விலையாகாதீர்

                                புடம் போட்ட மனதிலே
                                படம் போட்டுப் பார்த்து
                                வடம் இட்டிழுப்பீர் மனதை
                                வளமான பாதைக்கு

                                மெய்ஞானத்திலே தோய்வு-வாழ்வில்
                                மேடேறும் வாய்ப்பு!

                                   

உயர் முயற்சி

                                   உம்மையறிந்தவர் உரையாதிருப்பாரோ
                                   மாந்தரே -உயர்
                                   தன்மையோடு புரியும் நற்செயல்
                                   புகழாதிருப்பாரோ-மாந்தரே

                                  எத்தனை ஆயிரம் திட்டங்கள் தீட்டினும்
                                 மாந்தரே -அத்தனை
                                 திட்டமும் சட்டமெனச் செல்லுமா
                                 மாந்தரே

                                ஆழியிலுள்ள சிப்பியின் முத்தாய்
                                மாந்தரே -அனைத்துமே
                                ஆகுவதுண்டோ மாந்தரே

                                பாழாய்ப்போன சிப்பியையும் தான்
                                மாந்தரே -பக்குவமாய்
                                 கலைப்பொருள் செய்வாரே மாந்தரே

                               ஆங்கிலப் பயிற்சி அவசியமென்றாலும்
                                மாந்தரே -ஆற்றல்
                               அத்துணை பேருக்கும் ஒன்றாயிருக்குமோ
                               மாந்தரே

                             எல்லோரையுமேற்றும் எண்ணமென்றுமுண்டு
                             மாந்தரே -என்றாலும்
                             கரமொன்றின் விரல்களைந்தும்
                             ஒன்றாயிருத்தல் கூடுமோ?

                             உந்தன் முயற்சி உயர்ந்த முயற்சியே
                             மாந்தரே -விதை ஒன்று பழுதானால்
                             உழவனை நிந்தித்தல் நியாயமோ?

                            பட்டபாட்டிற்கான பலன் வேண்டாம்
                            என்பரோ மாந்தரே -பதர் ஒன்று
                            இருந்தால் பயிர் எல்லாம் பதர் எனல்
                             நியாயமோ?

முட்டாள் கூட்டம்

                                              
                                              முட்டாள்களின் தேசத்தில்
                                               முட்டுக்கட்டை என்பதிருக்கும்

                                              அறிவிலிகள் கூட்டத்தில்
                                              அட்டூழியம் என்பதிருக்கும்

                                              மூர்க்கர்களின் இடத்திலே
                                               முறைப்பு தவிர வேறேதுண்டு?

                                              மட்டமான மனிதர்களிடம்
                                              மரியாதை எதிர்பார்த்தல் முறையோ?

                                            அட்டகாசம் செய்யும்
                                             ஆணவக்காரர்களை
                                            ஆண்டவனிடம் விட்டுவிடு.

                                             ஆண்டொன்று போனால் வயதொன்று
                                             போகிறது,
                                             வஞ்சனை மட்டும் போகாதோ?

                                                 வீணர்களின் நெஞ்சில்
                                                 விஷமிருப்பதால்,
                                                 விபரீதம் நாம் காண்பது தகுமா?

சிந்தனையும்,சிரிப்பும்

                                                    
                                                 சிறு வயதிலேயே
                                                 சீறும் பார்வையா?
                                                 சீரிய பார்வையா?
                                                 சிந்தனையின் சிகரமாய்
                                                 நீ இருந்தாலும்
                                                 சிரித்து மகிழும் இளநகையே
                                                 அழகு !

                                                
                                              அறிவுப் பார்வை உனதாயிருக்கலாம்
                                              அழிவு போக்கும்,அன்பு தேக்கும்
                                               ஆன்மச் சிரிப்பு அழகல்லவா?

                                            சிறு நகை அழகு
                                            குறு நகை அழகு
                                            புன்னகை அழகு
                                            பூஞ்சிரிப்பு அழகு
                                            சிந்தனையோடு சேர்ந்த
                                             சிரிப்பென்பது
                                            அழகோ அழகு!

கலைமகள் கடாட்சம்

                                              
                                             அன்னையே சரணம்
                                             சரணம் தாயே!
                                             மகா சரஸ்வதி-என்
                                             மனதில் வந்து இறங்கு

                                           கலைவாணியே!-என்
                                           உள்ளத்தின் உள்ளே
                                           உறைந்திடு!
                                           அகம் முழுதும்
                                           ஆக்கிரமி!!

                                       இகம் உயர்த்தும் கலை தனைத்
                                       தந்திடு!
                                       இதயம் எங்கிலும்
                                        இன்ப ஊற்றாய்ப் பொங்கிடு!

பிணி

                                 அங்கம் முழுதும்
                                 அரற்றி அழுகிறது
                                 ஆற்றாமையினால்
                                 அலறித் துடிக்கிறது

                                  தங்கத்தால் பூட்டியங்கத்தைத்
                                 தாங்கவே செய்தாலும்
                                 தாளாத துயர் தந்து
                                 தவிக்க வைக்கும் பிணியே

                                அணிமணிகள் பூட்டியே
                                அழகு பல செய்தாலும்
                                 பிணியே நீ வந்திட்டால்
                                பெருந்துயர் தான் சேராதோ?

                                  சோம்பல் நோய்தான்
                                   சூழ்ந்து கொண்டால்
                                   சோகமே சேர்ந்திடுமே-வாழ்வின்
                                    வேகமே போய்விடுமே!
                                   உல்லாசம் கண்டிடவே
                                   உட்கார்ந்தே பணி செய்தால்
                                  பிணிதான் சூழ்ந்திடுமே

                             உழைப்பு என்னும்
                             உயர் மருந்தால்
                             உற்ற பிணி தீர்த்திடலாம்
                             உல்லாசமாய் வாழ்ந்திடலாம்!

                             வண்ண,வண்ண மாத்திரையால்
                            வாழ்வு வண்ணம் இழந்ததென்னே?
                            வகைவகையான மருந்துகளால்
                            வளம் தான் போனதென்னே?

                                      வளம் கண்டிடுவோமா?
                                      வலிமை பெற்றிடுவோமா?
                                       வறட்சி நிலை விடுத்து

                                       வனப்பான வாழ்வு கிட்டுமா?